ပြည်မြို့ မျိုးသုခ အထူးကုဆေးခန်းမှ ကျန်းမာရေးဝန်ထမ်းများ၏ တာဝန်မဲ့ လုပ်ရပ်ကြောင့် အသက်ဆုံးရှုံးခဲ့ရသည့် သားဖြစ်သူအတွက် မိဘများက သက်ဆိုင်ရာသို့ အမှုဖွင့်တိုင်ကြားထားသည်။
သရက်မြို့တွင်နေထိုင်သည့် ဦးမောင်မောင၊ ဒေါ်ဝေဝေလွင်တို့က သားဖြစ်သူ အသက် (၃၄)နှစ်အရွယ် ဖိုးလမင်း(ခ) ကိုနေဇာမင်း မျိုးသုခ အထူးကုဆေးခန်းတွင် တက်ရောက်ကုသနေစဉ် သေဆုံးခဲ့တာနှင့် ပတ်သက်၍ မြန်မာနိုင်ငံ ဆေးကောင်စီအဖွဲ့သို့ တိုင်ကြားစာပေးပို့ပြီး သရက်မြို့ ရဲစခန်းတွင်လည်း အမှုဖွင့်ထားကြောင်း မိသားစုဝင် တဦးက ပြောသည်။
“နေဇာမင်းက အသဲရောင်အသားဝါဖြစ်လို့ (၁) လပိုင်း (၉)ရက်နေ့မှာ ပြည်မြို့က သမားတော် ဦးခင်မောင်ညွှန့်နဲ့တိုင်ပင်ပြီး မျိုးသုခအထူးကုဆေးခန်းကို ပို့လိုက်တာ၊ သမားတော်ကြီးကိုယ်တိုင် အချိန်မီ ရောက်လာလို့ အခြေအနေ ကောင်းပါတယ်လို့ ပြောတယ်၊ အဲဒီက သူနာပြုဆရာမက ဆရာဝန်ပြောတဲ့အတိုင်း မလုပ်ဘဲ သွေးပေါင်ကျနေတာကို သိလျှက်နဲ့ ဆေးမသွင်းပေးလို့ ဒီလိုဖြစ်သွားတာ” ဟု ပြောသည်။
အထူးကုဆေးရုံဆေးခန်းများ၏ ပေ့ါဆမှုကြောင့် လူနာရှင်များအနေဖြင့် နောက်နောင် ယခုကဲ့သို့ ဖြစ်ရပ်မျိုး မဖြစ်စေရန် ကိုနေဇာမင်း၏ မိဘများက အမှုဖွင့်တိုင်းကြားခြင်းဖြစ်ကြောင်း ၎င်းက ဆက်ပြောသည်။
ယခုကဲ့သို့ မျိုးသုခ ဆေးခန်းမှ ဆရာဝန်သူနာပြုများက သမားတော်ညွှန်ကြားသည့်အတိုင်း ဆေးဝါးကုသမှု အဆင့်ဆင့် မပြုလုပ်ဘဲ လူနာကို သေစေရန် ပြုမှုခဲ့သည့် လုပ်ရပ်ကို သရက်မြို့ ရဲစခန်းတွင် အမှုအမှတ် (ပ) ၇/၂၀၁၁ ပြစ်မှုဆိုင်ရာ ဥပဒေ ပုဒ်မ ၃၀၄ (က) အရ အမှုဖွင့်တိုင်ကြားထားကာ အခင်းဖြစ်ပွားသည့် ပြည်မြို့ ရဲစခန်းသို့ လွှဲပြောင်းရန် ပြင်ဆင်နေကြောင်း ၎င်းကဆက်ပြောသည်။
ယင်းကဲ့သို့ ကိုနေဇာမင်းသေဆုံးခဲ့ရခြင်းနှင့်ပတ်သက်၍ မျိုးသုခအထူးကု ဆေးခန်းပိုင်ရှင်က သူနာပြုဆရာမ၏ ပေ့ါဆမှုသာဖြစ်ကြောင်း ပြောသည်ဟု ၎င်းက ဆက်ပြောသည်။
“၁၃ ရက်နေ့ကျတော့ ဆေးခန်းပိုင်ရှင် ဒေါ်လှမြိုင်က လာပြီးတောင်းပန်တယ်၊ သူတို့ ပေ့ါဆလို့ဖြစ်တာပေါ့၊ ပြီးတော့ အဲဒီ သူနာပြုကိုလဲ အလုပ်ထုတ်လိုက်ပြီပြောတယ်၊ အဲဒါကို ကာယကံရှင်တွေက သူနာပြုကိုတွေ့ချင်တယ်ခေါ်ပေးပြောတော့ သူတို့မသိတော့ဘူး အလုပ်က ထွက်သွားပြီဆိုပြီး ဆေးခန်းက မန်နေဂျာက ပြောတယ်” ဟု ကိုနေဇာမင်း၏ မိသားစုဝင်က ပြောသည်။
အလားတူ ၂၀၀၉ ခုနှစ်က ရန်ကုန်မြို့ SSC အထူးကုဆေးခန်းမှ ဆရာဝန်များ၏ ပေါ့ဆမှုကြောင့် မခိုင်ရွှမ်းလဲ့ရည်သေဆုံးခဲ့ရပြီး မကြာခဏ ဆိုသလိုပင် အထူးကုဆေးရုံ၊ ဆေးခန်းများတွင် ကျန်းမာရေးဝန်ထမ်းများ၏ ပေါ့လျော့မှုကြောင့် လူနာ အသက်ဆုံးရှုံးမှုများ ကြုံတွေ့နေရသည်။
No comments:
Post a Comment